मईया के गीत -५

मईया के गीत -५

सिंहवा चढली मईया गरजति अईली
हो की केकरी चढली ना आजु आईं हम पहुनवां हो की केकरी घरवां ना ।

अपनी मडईया से बोलेले कवन* सेवका हमरी घरवां ना
मईया आईं आजु पहुनवां की हमरी घरवां ना।

हम रउरी सिंघवा के खसीया दानावां देईबी
हो रनीयवें** हमरी ना रुउरा के पूजवा चढईहे
की रनीयवें हमरी ना।

* घर की लईकन चाहे बड़हन लोगन के नाम जोड़ी के।
** ऊपर की नाम से जुडल माई , बहिन या पत्नी के नाम रही।

मईया के गीति -४

मईया के गीति -४

सातों मईया की हथवा में लाल के छड़ी हे गुलाब छड़ी
मईया कबसे रउरा आईके आँगन में खड़ी ।

आँगन में खड़ी हो आगन में खड़ी मईया हमके* सिंदुरवा
भीखिया देईके चलीं मईया हमके बालाकवा भीखिया देईके चलीं.

*घर भरि की मेहरारू लोगनि के नाम जोड़ी के गावल जाई.

मईया के गीति- ३

मईया के गीति- ३
आजू दीन आजू दीन आजू दीनवां ना
शीतल मईया अईहे अंगना....... आजु हो दिनवां ना।
सातों मईया अईहे अंगना....... आजु हो दिनवां ना।

कहाँ पईबो ए मईया ओढ़ना बिछवना कहाँ हो पईबो ना
रउरा मन जोगे बिछवना कहाँ हो पईबो ना।

अपने मडईया से बोलेले मैत्रेय* सेवका
हम देबो ना हम देबो ना रउरा के मन जोगे बिछवना हमहो देबो ना।

हम देबो रउरा के ओदना बिछवना हम हो देबो ना
रउरा के ललकी चूनारीया हम हो देबो ना।

*अपनी घर की सब लोगन के नाम लेके जोड़ीके गीति गावल जाला.

मइया के गीति -२

मइया के गीति -२
मइया जे उतरेली बाग़ में ललना
लोग तमाशा देखे हे ललना।
का ओही माता के देखले ललना
देखत हियरा जुड़ईहे हे ललना।
का ओही माता के देखले ललना
देखत पाप परईहें ए ललना।

पनवा एईसन मईया पातर ललना
फुलवा एईसन सुकुवारी ए ललना ।
गंगा एईसन मईया नीरमल ललना
सूरुज धाहेले जोती ए ललना ।

हाथवा के लहू चुनारीया ललना
बजाजिन की भेसे जईह ए ललना।
हाथवा के लहू सिन्होरवा ललना
कुनेलिन की भेसे जईह ए ललना।

हाथवा के लहू फुलडलिया ललना
मल्होरिन की भेसे जईह ए ललना।
हाथवा के लहू दहीया ललना
गवालिन की भेसे जईह ए ललना।

काहो खाईबी काहो बेलसबी ललना
काहे लेजाईबी कैलाश ए ललना।
पान खाईबी फूल बेलसबी ललना
जस लेजाईबि कैलाश ए ललना।
जस देई जस देई शीतली मईया ललना
अपयस जासु बणी दूर ए ललना।

मईया के गीति एके न गावल जाला। कम से कम दूगो आ नाहीं त पांची गो गावेके चाही।

देवी गीत

देवी गीत
नीबिया की डाली मईया लावेली हिड़ोलवा की झूली झूली ना
मईया गावेली गीति की झूली झूली ना।

झूलत झूलत मईया के लगली पियसिया कि चली भइली ना
मलाहोरिया दुवारावा कि चली हो भइली ना
भीतर बाड़ू कि बाहर ऐ मलिनिया हो कि बूँद एक ना
हमके पनीया पियाव हो कि बूँद एक ना

कईसे में पनीया पियाईं शीतल मईया हो
कि मोरे गोदे ना बाने बालका नादान होकी मोरे गोदे ना

लेहू ना मालिनी सोने के खटोलावा कि
सुताई दीहो ना ऊ जे बालका नादान के सुताई दीहो ना
सोने के खटोलवा मईया टूटी फाटी जईहें
कि बलकावा मोरे ना कि भूईयवॉ लोटि जईहें कि बलकवा मोरे ना

एक हाथे लेली मालिनी झझर गेड़ुअवा हो दहिनवे हाथे ना
ले सिंहासन पाट हो दहिनवे हाथ ना
पनिया ही पी पाटे बईठी हे शीतली मईया
दी ना आशीष मईया मुख भरि आशीष मईया दीना

जईसे जईसे मालिनी हमें जुड़ववलू की ओईसे ओइसे ना
तहरे धीयवा जुड़ासु मालिनी ओईसे ओइसे ना
तहरे पतोहिया जुड़ासु मालिनी ओईसे ओइसे ना
धीया बाड़ी सासुर की पतोहिया अपने घरवा
की केकरा के मईया देयीले आशीष हो की केकराके
धीया बाढ़े सासुर की पतोहिया अपने घरवा
की मालिनी तोहरो हे बाढ़े एहवात हो की तोहरो
जवनी अशीशिया मईया मलिनियाँ के दीहनी
हो की तवने अशीशिया ना मईया ............के देंयी
मईया तवने अशीशिया ना
मईया तवने अशीशिया ना पूरे देशवा के देंयी
हो की तवने अशीशिया ना


एही तरे अपने सभी प्रियजन के नाम जोड़ि के गावल जाला ।



ई देवी गीत भोजपुरी क्षेत्र में कवनो शुभ अवसर सबसे पहिले गावल जाला एही से हम आपन बात ऐही गीत से करतानी ।
नमस्कार